Close Topic Options

[باب البحر]

ما سأذكره هو ما حدث لي بالفعل




توجهت يوما لاستطلاع شارعا في العتبة يسمى (شارع الجيش) سمعت عنه كثيرا و ربما كنت فيه من قبل لكن لم أكن أدري ما اسمه

تعرفت على شارع الجيش منذ فترة ليست ببعيدة .. و لكن أجهل أين امتداده ؟؟

فالشارع ينتهي عند العمارة رقم كذا و ستين .. بينما لدي عنوان شركة يوجد في عمارة رقم مائة وكذا ؟!

و عند صعودك من محطة مترو العتبة .. و بعد الخروج لموقف أتوبيس العتبة تحتاج للإلتفاف حول عمارات الميدان لتصل لبداية شارع الجيش.

فقادني عقلي - كعادتي عندما يكون لدي سعة من الوقت- أن أسلك الطريق المختصر ، و هو أن أجعل موقف الأتوبيس و الميني باص في ظهري و أسلك الخط المستقيم (أقصر الطرق).

ثم أتوجه يسارا - أثناء سلوكي الطريق المستقيم لاختصار الوقت ايضا.

و كانت الطامة المتوقعة

خرجت من حارة لدرب لزقاق و أنا اتخبط و اكتشف انه مسدود و ان هذا مسدود .. أين شارع الجيش ؟؟ !!!

حسب بوصلة دماغي أنا عايز أي حاجه مستقيمة !!! أو حتى واخده ملف شمال و سالكه ؟!!!

مشيت نحو إحدى الحارات فاستوقفني أحدهم بإشارة من يده . "مسدودة".




توجهت ناحية أحد الأشخاص أسأله فوجدته يقود شخصا أعمى و يخرجه من أحد ماخل العمارات القديمة و يشير إلي ..

قال: أهوه .. تسمح يا أستاذ توصل الأخ ده .. الحمد لله ابسط يا عم أهوه ملتحي زيك أهوه !!

قلت له: مش لما اعرف انا اخرج من هنا الأول !!

سألني الأخ القائد للشخص الأعمى: انتا رايح فين؟

قلت له: رايح شارع الجيش.

قال: عال عال .. هوه هيوصلك.

وقفت أنظر للرجل باستغراب و الكلمة واقفة في حلقي . مش راضية تخرج لحسن تجرح الراجل الكفيف .. لكن قلت: أدينا هنخبط احنا الاتنين مع بعض لغاية ما نطلع.

سألني الشخص الكفيف: انتا رايح فين؟

قلت له: رايح امتداد شارع الجيش . بس مش عارف فين.

قاللي: انا مش عارف هوه فين بالضبط

قطع كلامه و قال: حوّد شمال.

و الله يا جماعه انا استغرب كلمته .. شمال؟؟؟

قال ايوه

قلتله يعني الشارع ده اللي على ناصيته كذا

قال ايوه

؟؟؟؟

ثم تابع : لكن هوديك لشارع الجيش و ميدان باب الشعرية و انتا كده هتكون قريب...


ثم قال: لف شمال

قلت: شمال ؟؟ من هنا ؟ على الشارع اللي على ناصيته كذا

قال: مش عارف ناصيته ايه بس لف شمال ؟!!!

و الله انا فعلا شكيت في الراجل .. و قلن الراجل ده حاجه من الاتنين . يا بيشتغلني و هوه شايف ،، يا هوه نظره ضعيف جدا لدرجة انه بيقدر يميز حاجات و حاجات لأ

و بعد ذلك مباشرة واجهت الرجل عربات معدنية صغيرة بعجل يقودها أشخاص لحمل الأثقال يطلقون عليها (الأزق) و كاد يصطدم باثنان منها

و دار بيننا حوار علمت منه انه أعمى بالفعل و انه يسكن هذه المنطقة منذ مدة كبيرة جدا .. ثم طلب مني التوجه يمينا و بعد فترة قال: لو شفت قدامك الألواح المعدنية بتاعت المشروع يبقى كده وصلنا لشارع الجيش

و تنفست الصعداء عندما رأيتها أمامي

قمت بتوصيل الرجل للعنوان الذي يريد التوجه إليه و تبين أن العمارة التي أراد الذهاب إليها هي بالفعل . امتداد شارع الجيش

لكن الذي أثار تعجبي يا جماعة اني ماكنتش باقود الراجل . الراجل هوه اللي كان بيقودني


تذكرت مقولة والدتي . و هي المقولة المصرية الشهيرة : الغريب أعمى و لو كان بصير.


مغزى القصة اللي اتعلمت منه : ان احنا ممكن نكون أعمياء عن شئ يراه آخرون .. ممكن نضحك عليهم . نسخر منهم ، لكن الواعي هوه اللي يفكر في الموضوع من بدايته و يوزن الكلام و يفكر.

دي كانت بدايتي لما كنت أعمى و أخوة جنبي رايحين جايين م المسجد و الدروس ، و أنا أعمى ، و فاكر اني زيي زي كل الناس و الصح هوه اللي بيعمله كله الناس ، و ان دول (الملتزمين) عميان . عموا أنفسهم عن متع الدنيا و شغلوا بالهم بشئ مش ليهم . ده بتاع الشيوخ و بس.

و اكتشفت اني انا كنت الأعمى في وسط عميان .. و لأني شايف نفس اللي هما شايفينه . لم أشك للحظة.




مش دايما اللي بيعمله أغلب الناس بيكون هوه الصح.

الدين مش حكر و لا سر بين الشيوخ و العلماء .. تقدر تستزيد و تتعلم ، و اقرا بنفسك عن علماء بدأوا في سن متأخرة في الحياة.

[الطبيبة]

((وَمَنْ أَعْرَضَ عَنْ ذِكْرِي فَإِنَّ لَهُ مَعِيشَةً ضَنكًا وَنَحْشُرُهُ يَوْمَ الْقِيَامَةِ أَعْمَى * قَالَ رَبِّ لِمَ حَشَرْتَنِي أَعْمَى وَقَدْ كُنتُ بَصِيرًا * قَالَ كَذَلِكَ أَتَتْكَ آيَاتُنَا فَنَسِيتَهَا وَكَذَلِكَ الْيَوْمَ تُنسَى))[طه:124-126]


بصرني اللهم بما يرضيك واشرح له صدري ووجه إليه طاقاتي وأخضعه لقدراتي ..وجنبني اللهم مالا يرضيك واصرفه عن قلبي وخاطري واقطع عن التوجه إليه أنشطتي وقدراتي ..آمين


جزاكم الله خيرا